Publicacións

Ven de saír do prelo a última publicación editada por FESGA. Desta volta trátase dun libro, de 80 páxinas a toda cor, titulado “Síntese histórica do movemento obreiro galego, das orixes até 1984″, no que se fai un percorrido sobre a historia do movemento obreiro do noso páis desde as xuntas cenetistas de A Coruña até as folgas do naval en 1984. O percorrido é guiado por tres historiadores contemporaneistas de prestixio, como son Uxío-Breogán Diéguez, Dionisio Pereira e Bernardo Máiz.

“Percorrido pola historia da nación galega” foi o primeiro dunha serie tres folletos polípticos, no que se debulla de xeito ameno e sintético os principais trazos da historia da nosa nación dende a cultura castrexa até a década dos 90 do século XX, cunha importante presenza gráfica a través de ilustracións e fotografías. A vixente ocultación da historia de Galiza, é unha teima deliberada do españolismo para diluir a nosa identidade colectiva diferenciada, polo que a divulgación do coñecemento das orixes do noso pobo amosase coma un contributo positivo na dignificación da nosa identidade nacional.

A seguir preséntase unha nova edición dese material desta volta en formato caderno.

O catedrático de economía da Universidade de Santiago de Compostela, Xavier Vence, describe nesta publicación as orixes e os mecanismos que orixinaron a actual crise sistémica, abordando as diferentes burbullas especulativas, o endebedamento e a perda de poder de compra por parte da maioría social, así como a incidencia das principais potencias na economía mundial.

Segundo Vence, e a senso contrario do sostido polos media do sistema, non estamos unicamente perante unha crise de carácter económico-financeiro, senón que a esta hai que engadirlle outras non menos graves como son as crises enerxética, alimentica e de materias primas, o que no seu conxunto demostra a falencia e fracaso do modelo neoliberal. Así mesmo analizanse os posíbeis escenarios futuros e presenta unha serie de propostas e alternativas coas que facer fronte á crise.

O presente traballo realizouse pois desde FESGA coidabamos que era esencial en momentos como os actuais, nos que atravesamos unha fonda crise do sistema capitalista, con graves consecuencias para as condicións de vida da clase traballadora e outras camadas populares -e para o propio futuro de Galiza-, divulgar os conceptos fundamentais para comprendérmonos o sistema socio-económico vixente así como as súas alternativas.

Este caderno é un contributo necesario para todos/as aqueles que procuran superar a análise superficial e conxuntural do momento económico e social actual, indo á raíz mesma dos mecanismos profundos do capitalismo neoliberal, e que se propoñan darlle resposta desde unha orientación que estea ao servizo das maiorías sociais.