Sae á venda “O novo proletariado dixital na era do capitalismo pandémico”

O novo proletariado dixital na era do capitalismo pandémico, do profesor e investigador social brasileiro, Ricardo Antunes presenta un retrato polo miúdo da clase traballadora do noso tempo, nas súas principais tendencias, e afonda na análise detallada das mudanzas no mundo do traballo que se veñen producindo a escala planetaria.

Para Antunes, a chegada da pandemia da COVID-19 é o resultado dunha letal simbiose entre a crise estrutural do capital, que leva varios anos, unha crise social abafadora e unha profunda crise política con consecuencias inimaxinables. Así, no libro constátase que a práctica existente nos últimos anos foi a destrución sistemática da lexislación laboral e social que protexe a clase traballadora, ao impor un capitalismo depredador que a día de hoxe amosa a súa faciana máis violenta. O resultado é a expansión global dunha enorme taxa de desemprego, precariedade, temporalidade, etc., así como a aparición do novo proletariado de servizos, que se desenvolve no traballo dixital, nunha uberización que vai cada día en aumento.

Esta nova realidade que se está a impor no mundo do traballo, marcada pola nova enxeñaría dixital (algoritmos, intelixencia artificial...), leva a unha maior precarización e a unha maior explotación da clase traballadora, hoxe máis fragmentada, individualizada e invisibilizada que nunca. Os dereitos laborais, na consideración de Antunes, están a ser socavados por un capital, que despreza a totalidade dos límites humanos, sociais e ambientais. De aí tamén a importancia dun sindicalismo de clase, que fuxa da entelequia da concertación social e aposte pola combatividade e o conflito como maneira de avanzar na conquista de dereitos laborais.
Así, fronte ao capitalismo pandémico e ao que Antunes vén denominando o privilexio da servidume, o gran desafío que se abre para a clase traballadora é a reinvención da emancipación, como imperativo do noso tempo, e sempre nun horizonte socialista para a humanidade.

O novo proletariado dixital na era do capitalismo pandémico pretende ser, desde o seu enfoque marxista e o seu rigor analítico, un contributo a esa tan necesaria como urxente emancipación da clase traballadora, o novo proletariado do século XXI.