Este sábado, 18 de abril, procedeuse á inauguración da estatua en homenaxe a Xosé Ramón Reboiras Noia, obra do escultor Carlos Fernández e da artistia Cuqui Piñeiro. Na compostelá rúa da Carreira do Conde fíxose realidade a estatua, a tamaño real e en bronce, de "Moncho" Reboiras grazas ás doazóns realizadas por máis de 200 persoas e organizacións.
No acto interviñeron, tal e como se tiña anunciado, Suso Seixo, presidente da Fundación Moncho Reboiras, Elvira Souto, portavoz do Comisión de Honra, Francisco Rodríguez, Presidente da Fundación Terra e Tempo, e Goretti Sanmartín, alcaldesa de Santiago de Compostela. Seixo agradeceu, en nome da Comisión Organizadora, todas e cada unha das doazóns realizadas para facer realidade a estatua, así como ao goberno municipal de Compostela a súa receptividade desde un inicio para posibilitarse a devandita inauguración.
No acto participaron arredor de 250 persoas, chegadas desde distintos puntos do país, que remataron o acto cantando o himno galego, ao que seguiron cánticos como "Moncho Reboiras, a loita continúa" e "Galiza ceibe, poder popular".
A Comisión Organizadora dos actos en lembranza a Xose Ramón Reboiras Noia, diante do 50 aniversario do seu asasinato, sitúa aquí o cénit da exitosa campaña de actividades que vén desenvolvendo desde inicios de 2025, aínda que seguirá realizando actividades até o vindeiro 12 de agosto.
